ᱩᱱᱟᱹᱜ ᱡᱷᱟᱹᱞᱨᱮ ᱟᱞᱳᱢ ᱜᱚᱝᱠᱟᱹᱧᱟᱹ ᱵᱟᱵᱟ!
ᱵᱟᱵᱟ!
ᱩᱱᱟᱹᱜ ᱡᱷᱟᱹᱞᱨᱮ ᱟᱞᱳᱢ ᱜᱚᱝᱠᱟᱹᱧᱟᱹ,
ᱳᱠᱟᱨᱮ ᱤᱧ ᱥᱟᱶ ᱧᱟᱯᱟᱢᱳᱜ ᱦᱤᱡᱩᱜ ᱞᱟᱹᱜᱤᱫ ᱛᱮ
ᱳᱲᱟᱜ ᱨᱮᱱ ᱢᱮᱨᱚᱢᱠᱳ ᱟᱹᱠᱷᱨᱤᱧ ᱦᱳᱭᱳᱜ ᱛᱟᱢ᱾
ᱟᱞᱳᱢ ᱜᱳᱝᱠᱟᱹᱧᱟᱹ ᱳᱱᱟ ᱫᱤᱥᱚᱢᱨᱮ
ᱳᱠᱟᱨᱮ ᱢᱟᱱᱣᱟ ᱠᱷᱚᱱ ᱡᱟᱹᱥᱛᱤ ᱤᱥᱚᱨ ᱠᱳ ᱛᱟᱦᱮᱱᱠᱟᱱ!
ᱳᱠᱟᱨᱮ ᱵᱤᱨ ᱵᱩᱨᱩ ᱜᱟᱰᱟ ᱵᱟᱹᱱᱩᱜ
ᱚᱱᱰᱮ ᱤᱧ ᱞᱟᱹᱜᱤᱫ ᱠᱟᱛᱷᱟ ᱟᱞᱳᱢ ᱥᱟᱹᱜᱩᱱᱟ᱾
ᱚᱱᱰᱮ ᱫᱚ ᱛᱤᱥᱟᱨᱮᱜᱮ ᱵᱟᱝᱟ
ᱚᱱᱮ ᱳᱠᱟᱨᱮᱭᱟᱜ ᱥᱚᱲᱚᱠ ᱨᱮ
ᱢᱚᱱᱮ ᱠᱷᱚᱱᱦᱚᱸ ᱛᱟᱹᱯᱤᱥᱛᱮ ᱪᱟᱞᱟᱜ ᱠᱟᱱ ᱢᱚᱴᱚᱨ ᱜᱟᱹᱰᱤᱠᱳ,
ᱩᱥᱩᱞ ᱫᱳᱞᱟᱱ ᱟᱨ ᱞᱟᱹᱴᱩ–ᱞᱟᱹᱴᱩ ᱫᱳᱠᱟᱱ᱾
ᱳᱱᱟ ᱳᱲᱟᱜ ᱥᱚᱝᱜᱮ ᱟᱞᱳᱢ ᱡᱳᱲᱟᱣᱟ ᱤᱧᱟᱜ ᱥᱟᱹᱜᱟᱹᱭ
ᱳᱠᱟᱨᱮ ᱞᱟᱹᱴᱩ ᱢᱟᱪᱷᱟ ᱨᱟᱪᱟ ᱵᱟᱹᱱᱩᱜ
ᱳᱠᱟᱨᱮ ᱥᱟᱹᱱᱰᱤᱟᱜ ᱠᱩᱠᱲᱩᱛᱮ ᱵᱟᱝ ᱦᱳᱭᱳᱜ ᱠᱟᱱ ᱥᱮᱛᱟᱜ
ᱟᱨ ᱳᱠᱟᱨᱮ ᱥᱤᱝᱜᱟᱹᱲ ᱠᱩᱰᱟᱹᱢ ᱥᱮᱡ ᱠᱷᱚᱱ
ᱵᱩᱨᱩᱨᱮ ᱩᱱᱩᱢᱚᱜ ᱠᱟᱱ ᱥᱤᱧ ᱪᱟᱱᱫᱳ ᱵᱟᱭ ᱧᱮᱞᱚᱜ᱾
ᱟᱞᱳᱢ ᱵᱟᱪᱷᱟᱣᱮᱭᱟ ᱳᱱᱠᱟᱱ ᱡᱟᱶᱟᱸᱭ
ᱚᱠᱚᱭ ᱫᱚ ᱦᱟᱹᱱᱰᱤᱛᱮ ᱩᱱᱩᱢ ᱵᱩᱞᱠᱚᱜ
ᱠᱩᱲᱷᱭᱟᱹ ᱟᱨᱮ ᱟᱥᱟᱝᱯᱳᱰᱟ ᱜᱮ,
ᱞᱤᱱᱰᱟᱹᱨᱜᱮ ᱢᱮᱞᱟ ᱴᱷᱮᱞᱟ ᱠᱷᱚᱱ ᱠᱩᱲᱤ ᱟᱹᱛᱠᱤᱨ ᱠᱳᱨᱮ,
ᱱᱳᱱᱠᱟᱱ ᱡᱟᱶᱟᱸᱭ ᱫᱚ ᱟᱞᱳᱢ ᱵᱟᱪᱷᱟᱣᱟᱹᱧᱟᱹ᱾
ᱡᱟᱸᱦᱟᱸ ᱛᱷᱟᱹᱨᱤ ᱞᱳᱴᱟ ᱛᱷᱳ ᱵᱟᱝ ᱠᱟᱱᱟ
ᱡᱮ ᱡᱟᱸᱦᱟᱸᱛᱤᱱᱨᱮᱜᱮᱧ ᱢᱮᱱ
ᱵᱚᱫᱚᱞᱜᱚᱫ ᱠᱮᱫ ᱜᱤᱧ
ᱵᱩᱜᱤ ᱵᱟᱹᱲᱤᱡ ᱞᱮᱱᱠᱷᱟᱱ᱾
ᱚᱠᱚᱭ ᱫᱚ ᱠᱟᱛᱷᱟ–ᱠᱟᱛᱷᱟᱨᱮ ᱠᱟᱛᱷᱟᱭ ᱢᱮᱱ ᱴᱷᱮᱝᱜᱟ ᱢᱩᱛᱟᱹᱠ ᱨᱮᱭᱟᱜ
ᱥᱟᱵ ᱳᱰᱳᱠᱮ ᱟᱜ ᱥᱟᱨ, ᱴᱮᱝᱜᱚᱡ
ᱡᱟᱸᱦᱟᱸᱛᱤᱱᱨᱮᱜᱮ ᱢᱚᱱᱮ ᱳᱰᱳᱝ ᱪᱟᱞᱟᱜ ᱵᱟᱝᱜᱟᱞ,ᱟᱥᱟᱢ ᱥᱮ ᱠᱟᱹᱥᱢᱤᱨ
ᱱᱳᱝᱠᱟᱱ ᱡᱟᱶᱟᱸᱭᱫᱚ ᱵᱟᱝ ᱡᱟᱹᱨᱩᱲᱟᱹᱧᱟᱹ ᱤᱧ ᱫᱚ᱾
ᱩᱱᱤᱟᱜ ᱛᱤᱨᱮ ᱤᱧᱟᱜ ᱛᱤ ᱟᱞᱳᱢ ᱡᱤᱢᱟᱹ ᱠᱟᱹᱛᱤᱧᱟ
ᱚᱠᱚᱭᱟᱜ ᱛᱤᱛᱮ ᱛᱤᱥᱜᱮ ᱫᱟᱨᱮ ᱵᱟᱝ ᱨᱚᱦᱚᱭᱟᱠᱟᱱ
ᱯᱷᱚᱥᱚᱞᱠᱳ ᱵᱟᱭ ᱚᱨᱟᱡᱚᱱᱟᱠᱟᱫ ᱳᱠᱟ ᱛᱤ ᱠᱤᱱᱛᱮ,
ᱳᱠᱟ ᱛᱤ ᱠᱤᱱ ᱫᱚ ᱡᱟᱸᱦᱟᱸᱭ ᱵᱟᱭ ᱜᱚᱲᱳᱣᱟᱠᱟᱫ ᱠᱳ
ᱡᱟᱸᱦᱟᱸᱭᱟᱜ ᱵᱳᱡᱷᱟ ᱵᱟᱭ ᱛᱩᱞ ᱨᱟᱠᱟᱵ ᱟᱠᱟᱫ᱾
ᱟᱨ ᱦᱚᱸ ᱟᱨ
ᱳᱠᱟ ᱛᱤ ᱚᱞᱚᱜ ᱵᱟᱭ ᱵᱟᱰᱟᱭ "T" ᱛᱮ ᱛᱤ
ᱩᱱᱤᱭᱟᱜ ᱛᱤᱨᱮ ᱤᱧᱟᱜ ᱛᱤ ᱟᱞᱳᱢ ᱡᱤᱢᱟᱹ ᱠᱟᱹᱛᱤᱧᱟ᱾
ᱵᱟᱯᱞᱟᱭᱧᱠᱷᱟᱱ ᱫᱚ ᱚᱱᱰᱮ ᱵᱟᱯᱞᱟᱭᱧᱢᱮᱸ
ᱳᱠᱟᱨᱮ ᱵᱟᱥᱠᱮᱭᱟᱜ ᱨᱮ ᱳᱰᱳᱝᱠᱟᱛᱮ ᱥᱤᱝᱜᱟᱹᱲ ᱦᱟᱹᱵᱤᱡ ᱛᱮᱹᱧ ᱨᱩᱣᱟᱹᱲ ᱫᱟᱲᱮᱭᱟᱜ ᱛᱟᱲᱟᱢᱛᱮ
ᱤᱧ ᱡᱩᱫᱤ ᱡᱟᱸᱦᱟᱸᱱ ᱫᱩᱠᱨᱮᱧ ᱨᱟᱜᱽ ᱱᱳᱣᱟᱥᱟ ᱜᱷᱟᱴᱨᱮ
ᱛᱚᱵᱮ ᱜᱟᱰᱟ ᱦᱟᱱᱟᱥᱟ ᱜᱷᱟᱴᱨᱮ ᱟᱢᱮᱢ ᱯᱟᱭᱨᱟᱜ ᱨᱮ
ᱟᱧᱡᱚᱢ ᱠᱟᱛᱮᱢ ᱦᱮᱡ ᱫᱟᱲᱮᱭᱟᱜ ᱤᱧᱟᱜ ᱦᱚᱢᱚᱨ ᱦᱟᱞᱟᱝ᱾
ᱢᱟᱛᱠᱚᱢ ᱞᱟᱴᱷᱮ ᱟᱨ ᱠᱷᱤᱡᱩᱨ ᱜᱩᱲ ᱵᱮᱱᱟᱣ ᱠᱟᱛᱮᱹᱧ ᱠᱳᱞ ᱫᱟᱲᱮᱭᱟᱜ ᱥᱟᱱᱫᱮᱥ
ᱟᱢ ᱠᱷᱟᱹᱛᱤᱨ
ᱦᱟᱱᱛᱮ ᱠᱷᱚᱱ ᱦᱤᱡᱩᱜ ᱥᱮᱱᱚᱜ ᱡᱟᱸᱦᱟᱸᱭ ᱠᱳᱣᱟᱜ ᱛᱤᱛᱮ ᱡᱮᱢᱚᱱᱤᱧ ᱠᱳᱞ ᱫᱟᱲᱮᱭᱟᱜ ᱦᱚᱛᱚᱫ,ᱠᱳᱦᱱᱰᱟ,ᱵᱩᱨᱩ ᱠᱟᱨᱞᱟ,ᱜᱷᱟᱝᱜᱽᱨᱟ ᱡᱚᱠᱷᱮᱡᱼᱡᱚᱠᱷᱮᱡ ᱨᱮ ᱜᱚᱜᱚ ᱞᱟᱹᱜᱤᱫ ᱦᱚᱸ᱾
ᱢᱮᱞᱟ ᱦᱟᱴᱼᱵᱟᱡᱟᱨ ᱦᱤᱡᱩᱜ ᱪᱟᱞᱟᱜ ᱨᱮ
ᱧᱟᱢ ᱫᱟᱲᱮᱭᱟᱠᱳ ᱟᱯᱱᱟᱨ ᱡᱟᱸᱦᱟᱸᱭ
ᱞᱟᱹᱭ ᱫᱟᱲᱮᱣᱟᱹᱧᱠᱳ ᱟᱛᱳ ᱳᱲᱟᱜ ᱨᱮᱭᱟᱜ ᱵᱳᱜᱮ ᱡᱩᱫᱟᱹ
ᱠᱟᱵᱽᱨᱟ ᱜᱟᱹᱭ ᱦᱚᱯᱚᱱᱟᱠᱟᱱ ᱨᱮᱭᱟᱜ ᱠᱷᱚᱵᱚᱨ
ᱞᱟᱹᱭ ᱫᱟᱲᱮᱣᱟᱹᱧᱠᱳ ᱳᱱᱠᱟᱛᱮ ᱯᱟᱨᱚᱢᱚᱜ ᱡᱚᱠᱷᱮᱱ ᱳᱱᱠᱟᱱ ᱴᱷᱟᱹᱸᱤᱨᱮ ᱤᱧ ᱫᱚ ᱵᱟᱯᱞᱟᱠᱟᱹᱧ ᱢᱮᱸ᱾
ᱳᱱᱟ ᱫᱤᱥᱚᱢᱨᱮ ᱜᱚᱝᱠᱟᱹᱧᱢᱮ ᱳᱠᱟᱨᱮ ᱤᱥᱚᱨ ᱠᱚᱢ ᱢᱟᱱᱣᱟ ᱰᱷᱮᱨᱠᱳ ᱛᱟᱸᱦᱮᱸᱱᱠᱟᱱ ᱢᱮᱨᱚᱢ ᱟᱨ ᱠᱩᱞ ᱢᱤᱫ ᱜᱷᱟᱴᱨᱮ ᱫᱟᱜ ᱠᱳ ᱧᱩᱮᱫ ᱠᱟᱱ ᱳᱠᱟᱨᱮ
ᱳᱱᱠᱟᱱᱴᱷᱮᱱᱜᱮ ᱜᱚᱝᱠᱟᱹᱧᱢᱮ᱾
ᱩᱱᱤ ᱥᱟᱶᱜᱮ ᱵᱟᱯᱞᱟ ᱠᱟᱹᱧᱢᱮᱸ ᱚᱠᱚᱭᱫᱚ ᱡᱩᱨᱤ ᱯᱟᱨᱣᱟ ᱟᱨ ᱯᱳᱛᱟᱢ ᱞᱮᱠᱟ
ᱡᱟᱣᱜᱮ ᱥᱚᱸᱝᱜᱮ ᱛᱟᱦᱮᱸᱱ
ᱳᱲᱟᱜ ᱵᱟᱦᱮᱨ ᱠᱷᱮᱛᱠᱳᱨᱮ ᱠᱟᱹᱢᱤ ᱠᱷᱚᱱ
ᱟᱹᱭᱩᱵ ᱥᱩᱠᱼᱫᱩᱠ ᱦᱟᱯᱟᱴᱤᱧ ᱦᱟᱹᱵᱤᱡ
ᱵᱟᱪᱷᱟᱣᱟᱹᱧᱢᱮᱸ ᱱᱳᱝᱠᱟᱱ ᱡᱟᱶᱟᱸᱭ ᱚᱠᱚᱭ ᱫᱚᱭ ᱱᱚᱸᱨᱚᱸᱝᱮᱫ ᱠᱟᱱ ᱧᱚᱦᱚᱸᱲ ᱛᱤᱨᱤᱭᱟᱹ ᱟᱨ ᱛᱩᱢᱫᱟᱜ ᱴᱟᱢᱟᱠ ᱨᱩᱨᱮ ᱞᱟᱠᱮᱨ᱾
ᱱᱤᱨᱚᱱ ᱫᱤᱱᱠᱳᱨᱮ ᱚᱠᱚᱭ ᱫᱚᱭ ᱟᱹᱜᱩ ᱫᱟᱲᱮᱭᱟᱜ ᱫᱤᱱᱟᱹᱢ ᱦᱤᱞᱳᱜ
ᱤᱧᱟᱜ ᱥᱩᱫ ᱨᱮ ᱞᱟᱹᱜᱤᱫ ᱢᱩᱨᱩᱫ ᱵᱟᱦᱟ᱾
ᱚᱠᱚᱭᱫᱚ ᱵᱟᱭ ᱡᱚᱢ ᱫᱟᱲᱮᱭᱟᱜ ᱤᱧ ᱨᱮᱝᱜᱮᱡ ᱤᱧ ᱛᱟᱦᱮᱸᱱ ᱨᱮ
ᱩᱱᱤ ᱥᱟᱶᱜᱮ ᱵᱟᱯᱞᱟᱠᱟᱹᱧᱢᱮ ᱤᱧ ᱫᱚ᱾
ᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼ
ᱩᱛᱱᱤ ᱫᱩᱨ ᱢᱟᱛ ᱵᱽᱭᱟᱦᱱᱟ ᱵᱟᱵᱟ!
ᱥᱨᱳᱛ :
ᱯᱩᱥᱛᱠ : ᱱᱟᱜᱟᱲᱮ ᱠᱤ ᱛᱟᱨᱟᱦ ᱵᱟᱡᱽᱛᱮ ᱥᱟᱵᱽᱫᱽ (ᱯᱨᱤᱥᱴᱷ ᱔᱙)
ᱨᱟᱪᱱᱟᱠᱟᱨ : ᱱᱤᱨᱢᱞᱟ ᱯᱩᱛᱩᱞ ᱯᱨᱟᱠᱟᱥᱟᱱ : ᱵᱷᱟᱨᱟᱛᱤᱭ ᱜᱽᱭᱟᱱᱯᱤᱴᱷ ᱥᱟᱸᱥᱠᱟᱨᱟᱬ : ᱒᱐᱐᱕
